Birləşmiş Ərəb Əmirliklərinin Dubay şəhərində keçirilən “Düşüncələri birləşdirək, daha yaxşı gələcək quraq” mövzusuna həsr olunmuş “Dubay Ekspo 2020” ümumdünya sərgisi çərçivəsində Energetika Nazirliyi tərəfindən bərpa olunan enerji sahəsinə dair konfrans təşkil olunub. Azərbaycanda “yaşıl enerji” sahəsinə xarici sərmayələrin cəlb edilməsi məqsədilə keçirilən bu tədbirdə sərgidə iştirak edən investorlara ölkəmizin bərpa olunan enerji potensialı, sahə üzrə strateji hədəflər, qanunvericilik bazasının təkmilləşdirilməsi istiqamətində görülən işlər, özəl sektorla əməkdaşlıq üçün yaradılmış imkanlar haqqında məlumat verilib.
Tədbirdə salamlama nitqi ilə çıxış edən energetika nazirinin müavini Elnur Soltanov bildirib ki, enerji və ekoloji təhlükəsizliyin təmin edilməsi ilə bağlı çağırışların enerji sektorunu təxirəsalınmaz dəyişikliklərlə üz-üzə qoyduğu bu dövrdə dövlət və özəl sektoru, maliyyə institutlarını, beynəlxalq təşkilatları və digər maraqlı tərəfləri əhatə edən çoxtərəfli əməkdaşlıq mühüm əhəmiyyət kəsb edir. Nazir müavini BMT-nin İqlim Dəyişikliyi üzrə Çərçivə Konvensiyasının 26-cı Sessiyasında ölkəmizin yeni hədəflə çıxış edərək, 2050-ci ilə qədər istixana qazı emissiyalarının 40 faizədək azaldılması ilə bağlı əlavə könüllü öhdəlik götürdüyü haqqında tədbir iştirakçılarını məlumatlandırıb. Azərbaycan Respublikasının Prezidenti cənab İlham Əliyevin aydın, uzunmüddətli dayanıqlı inkişafa əsaslanan baxışlarını əks etdirən strateji hədəflərin sırasında ölkəmizin elektrik enerjisi üzrə ümumi qoyuluş gücündə bərpa olunan enerjinin payının növbəti onillik ərzində 30%-ə çatdırılmasının da yer aldığını bildirib. Qeyd edilib ki, 1500 meqavatlıq yeni istehsal güclərinin istismara verilməsini nəzərdə tutan bu hədəfə nail olmaq üçün müəyyənləşdirilmiş əsas prioritetlərdən biri bu sahəyə özəl, o cümlədən xarici investisiyaların cəlbidir.
Daha sonra Energetika Nazirliyinin əməkdaşları tərəfindən ölkəmizdə “yaşıl elektrik enerjisi” istehsalının təşviq edilməsi üçün dəstək mexanizmləri, investisiyaların cəlbinə hesablanmış normativ sənədlər, yaxın gələcəkdə təşkil edilməsi nəzərdə tutulan bərpa olunan enerji hərracları haqqında məlumatlara dair video və təqdimat nümayiş etdirilib. Erməni işğalından azad edilmiş ərazilərimizin “yaşıl enerji zonası” elan edildiyi, Yaponiyanın TEPSCO şirkəti cəlb edilməklə bu zonanın yaradılması üzrə müfəssəl Konsepsiya layihəsinin hazırlandığı və müvafiq Baş Planın hazırlanmaqda olduğu diqqətə çatdırılıb. Qarabağ və Şərqi Zəngəzurda “yaşıl enerji”dən maksimum istifadə hədəfləri və planlarının özəl sektorla əməkdaşlıq üçün açılan imkanları daha da genişləndirdiyi bildirilib.
Beynəlxalq Bərpa Olunan Enerji Agentliyi, bp, Acwa Power və Masdar şirkətlərinin nümayəndələri tərəfindən isə Azərbaycanda bərpa olunan enerji sahəsində mövcud investisiya mühiti haqqında təqdimatlar nümayiş olunub, ölkəmizdə özəl investisiya hesabına reallaşdırılması planlaşdırılan sənaye miqyaslı külək və günəş enerjisi layihələrinə dair ətraflı məlumat verilib.
Tədbirin sonuncu sessiyasında məruzəçilər tərəfindən iştirakçıların mövzu ətrafında sualları cavablandırılıb.
İki saat davam edən konfransdan sonra tədbir iştirakçıları ilə birlikdə 2000 kvadratmetrdən çox ərazini əhatə edən “Gələcəyin toxumları” adlı Azərbaycan pavilyonu ziyarət edilib, burada nümayiş olunan texnoloji güllər, beş rəqəmsal ağacdan ibarət texnoloji meşə, multifunksional interaktiv masa instalyasiyası və digər innovativ texnologiyalar vasitəsilə ölkəmiz haqqında məlumatlarla tanış olunub.
Tədbir çərçivəsində, həmçinin bir sıra şirkətlərin nümayəndələri ilə ikitərəfli görüşlər keçirilib, qarşılıqlı maraq doğuran məsələlər ətrafında müzakirələr aparılıb.
